Padlet í kennslu

Padlet er veflægt forrit sem hægt að líkja við stafræna korktöflu. Í stuttu máli er þetta einföld vefsíða sem virkar í öllum vefvöfrum þar sem mögulegt er að deila upplýsingum á margskonar formi. Á hverja töflu er hægt að „festa“  ýmsar upplýsingar m.a. myndir, skjöl, vefslóðir, myndskeið o.fl. Val stendur um nokkur sniðmát og geta margir unnið saman í hverri töflu.

Hver „tafla“  eða padlet fær sinn eigin QR-kóða og auðvelt er að deila, flytja út eða fella inn í vefsíður (t.d. Moodle). Einnig er hægt að prenta hana út, vista sem mynd, PDF skjal, CSV eða Excel skrá.

Einfalt er að stýra aðgengi. Sem dæmi er hægt að læsa töflu með lykilorði og stýra hvort viðkomandi hefur les- eða skrifréttindi eða megi breyta henni. Nauðsynlegt er að stofna notandaaðgang með netfangi eða nýta tengingu við samfélagsmiðla. 

Hægt er að nota ókeypis útgáfu af Padlet en þar er þó mjög takmarkaður fjöldi borða (3). Ef kennari kýs að nota Padlet með fleiri borðum verður að kaupa áskrift. Forritið er aðgengilegt á vefsíðunni www.padlet.com og virkar á öllum vefvöfrum. Einnig er það til sem smáforrit fyrir spjaldtölvur og snjallsíma bæði iOS og Android.

Hugmyndir um notkun í kennslu:

Hægt er að nýta Padlet í kennslu til að auka virkni nemenda, safna saman gögnum og deila með hópi. Kennslumiðstöð hefur nýtt sér tæknina til að senda efni á þátttakendur námskeiða að þeim loknum og til að safna saman efni varðandi ákveðin málefni s.s. sjálfsamt deilda 2. Nánari leiðbeiningar um notkun padlet er að finna á padlet.com

  • Undirbúningur
  • Umræður innan sem utan kennslustofunnar (e. backchannel chat)
  • Samvinna
  • Spurt og svarað
  • Miðla upplýsingum
  • Greinasafn
  • Aðgerðalisti (e. To do list)
  • Glósur

Hér fyrir neðan er sýnishorn af Padlet töflu þar sem innfellingarkóði (e. embed) er nýttur. Þessi tafla er stillt þannig að þú getur einungis lesið.

Bein slóð er:  https://padlet.com/kennslumidstod/namsmat