Nýjasta viðbótin við námskeið Háskóla Íslands eru MOOC námskeið hjá edX en Mooc stendur fyrir „Massive open online course“.

edX er eitt af stóru nöfnunum í framleiðslu MOOC námskeiða og gilda mjög strangar reglur um þá sem þar fá að taka þátt. Háskóli Íslands fékk tilboð um að vera með í þeim hópi og nú þegar er byrjað að vinna við fyrsta námskeiðið sem hefst í febrúar 2018.

Einföld skilgreining á MOOC gæti verið að þetta er ákveðin framsetning á námsefni á netinu. Námskeiðin eru opin öllum og engar fjöldatakmarkanir. Vinsæl námskeið geta því verið mjög fjölmenn, allt upp í nokkra tugi þúsunda sem sækja það.